Möguleikar á gasvinnslu á sorphaugum Akureyrarbæjar á Glerárdal, er lykillinn að því að hafinn er undirbúningur að byggingu koltrefjaverksmiðju á Akureyri. Í gær var undirritaður rammasamningur þess efnis að kanna á næstu tveimur árum hvort ráðist verður í byggingu verksmiðjunnar á Akureyri. Hér yrði um margra milljarða verkefni að ræða, árs framleiðslugeta verksmiðjunnar yrði um þúsund tonn og starfsmenn um áttatíu.

Það voru Eyþór Arnalds, framkvæmdastjóri Strokks ehf. og Hermann Jón Tómasson, bæjarstjóri á Akureyri sem undirrituðu samninginn, en Strokkur er helmings eigandi hlutafjár í aflþynnuverksmiðju Becromal í Krossanesi. Hugmyndin er að möguleg koltrefjaverksmiðja verði við Rangárvelli ofan Akureyrar.

Eyþór Arnalds segir margt mæla með Akureyri sem stað fyrir slíka verksmiðju. Þar sé rík iðnaðarhefð og góð verkþekking, raforkusala til stóriðju sé þegar til staðar í Krossanesi og einstaklega góður aðgangur að metangasi af Glerárdal.